【新聞】教育部閩南語認證113年第2改考試從4月15開始報名（閩南語版）（閩南語版含聲音檔）
發布日期：113年4月15日
咱教育部閩南語語言能力認證考試對112年開始，一冬就會辦2改。今年度第1擺的考試（包含A、B、C卷）已經佇3月考過矣，第2擺按算8月欲辦，干焦會考A、B兩卷。因為這擺A卷頭擺改做電腦化測驗，目前規劃排佇第2工113年8月初4（禮拜）考；頭工8月初3（拜六）會先考B卷。報名猶原維持1人干焦會當報1卷爾爾(niâ)，咱欲報名著較點陳咧細膩袂蝕本。
有關8月考試報名的時間，對113年4月15早起9點開始，到5月初10下晡5點。報名的對象無限定身份佮年歲，凡若有興趣的，攏會當上網報名。報名費250箍，19歲以下的通優待免抾錢。考試彼工，所有測驗的項目（聽、講、讀、寫4項）若考攏有齊著的，阮有攢1份紀念品欲來相送喔。
閣再，猶未讀冊的細漢囡仔（6歲以下）抑是歲頭較濟（65歲以上）的人若欲考A卷，感覺家己齊用電腦考試加減會有困難的，嘛通申請特殊的服務。特殊考試的方式，除去口語測驗自底就是用電腦考的掠外，其他的科目攏會當維持用紙筆的方式考。詳細的說明請看刊佇考試網站（https://blgjts.moe.edu.tw）頂懸的簡章內容。為著欲予考生適應用電腦考試，教育部已經佇112年10月18號公佈電腦化測驗線頂模擬平台（https://blgjts.moe.edu.tw/tmt_demo），考生會當較捷來試用看覓咧。
教育部對99年開始辦認證考試，到今報名總人數都也有18萬6,971人起起囉。咱若按今年3月報名的資料共看，猶是學生族群報名的人上濟，有9,200人，其中12歲以下的就有4,113人，占欲學生族群的4成較加。向望未來有閣較濟的少年家通相招來學咱在地的本土語，本土語欲生湠有恁相伨決定會有卜面。
有關考試的資訊，已經有共刊佇認證考試的網站（https://blgjts.moe.edu.tw），會當去「最新消息」查。若猶有其他考試相關的問題，才請聯絡承辦單位國立臺灣師範大學。服務專線：0800-699-566、(02)7749-3664；嘛有服務信箱：blg.sce@deps.ntnu.edu.tw。
