閩南語認證報名人額大進益 團體報名超過4成較加(閩南語版)

教育部「閩南語語言能力認證考試」按算佇今年的8月初8(拜六)早起9點開始,全國有18个考區、48間學校會相佮舉辦。這擺考試的人數閣再大進益,攏總1萬3,886人報名,上濟歲的80捅,上幼茈的6歲足,猶閣有對法國、美國、日本、馬來西亞等無仝國家來的考生,嘛欲做伙來試一下仔鹹汫。

團體報名的對象除去師生組掠外,教育部為著欲鼓舞厝裡的序大佮囡仔做伙來學母語,若是仝口灶相????(sio-tshuā)到的,2个來就通準「團報」。今年的團體報名特別熱場,全國團報的攏總有957組、8,234人報名,並舊年的720組猶閣較濟,超過4成較加。其中臺南市海佃國中團報的總人數仝款著頭等,攏總有370人,拚第2坎的是臺南市中山國中,嘛有236人參加。

今年國際「嚴重特殊傳染性肺炎」的影響的確著力,這擺的閩南語認證考試有特別設一个防疫措施處理原則的新例,會配合中央流行指揮中心的防疫事工執行。較驚的是濟人會相穢,除去猶著人顧的囡仔,抑是有歲的老大人佮特殊考生掠外,逐个極加孤一人來就好。另外,全國的考場嘛會磅體溫,考生也著掛喙罨,愛隔開抑是需要檢疫的人,嘛著代先通報。

這擺的考試按算今年10月19早起9點開放網路查成績,嘛會寄成績單通知,考生準若到10月23猶未收著的,才請佮承辦單位國立臺灣師範大學聯絡;設使對家己的成績有憢疑的,請佇10月19到10月23,用紙本寄批申請複查。考生成績有達到分級標準的,就通收著認證通過的證書(今年10月26會開始寄);佇一禮拜內若無收著的,才請緊佮承辦單位聯絡。以上的資訊,攏會刊佇109年「閩南語語言能力認證考試」的網站(http://blgjts.moe.edu.tw),嘛通敲服務專線0800-699566照會。

新聞稿音檔下載https://language.moe.gov.tw/upload/download/jts/other/blgexam_1090808.mp3


公告時間:2020-08-08
更新時間:2020-08-10

回首頁