【公告】「口罩」的閩南語愛按怎講? 閩南語認證考試予恁會曉講 閣會曉寫(閩南語版)

 (閩南語版含聲音檔)發布日期:109年4月5日 

       咱敢了解家己的母語能力到啥物坎站?敢知影「口罩」的閩南語愛按怎講、按怎寫?(寫做「喙罨」https://twblg.dict.edu.tw)抑是講敢有才調全然用閩南語佮人開講10分鐘?若無,講5分鐘敢會輕可?

       咱若是想欲知影家己閩南語的語言程度,歡迎參加教育部「109年閩南語語言能力認證考試」。報名的期間是109年4月初10早起9點,到5月初8下晡5點,干焦開放網路報名,身份無限,外國人嘛通參加。報名費250箍,19歲以下優待免費,若通完成所有的測驗(聽、講、讀、寫4項),就會當得著1份紀念品(旅行收納袋佮行李吊牌)。舊考生這擺閣再來挑戰的,若有才調加進步一級,阮另外猶有攢獎勵品,予恁聽好一空掠雙隻,考一擺就趁兩份。團體報名的,報名人數上濟的前500名,阮有攢限量大禮欲來相款待。學校團體報名若超過30人,教育部猶會請縣市政府提供行政獎勵。

       教育部對99年開始辦理認證考試,到今都也超過7萬9,000外人報名囉。107年開始,7歲到12歲的考生那來那濟,干焦彼年就有4,300外人,占41.75%;到108年有5,600外人報名,嘛達到48.36%。表示這馬有愈來愈濟的少年家,肯欲接觸佮學習閩南語囉。

       政府向望鼓舞學生囡仔佮老師做伙來參加閩南語認證考試,嘛通紲這个勢予家長綴咧認捌「學母語」正正是文化傳承的重要事工。為著欲予家長佮囡仔會使做伙學習,認證考試的網站有提供一个「自學資源」專區,特別是「學習地圖」就有整合基礎級到進階級的參考資料,歡迎逐家使用。若是以早毋捌考過的民眾,想欲了解題型佮考試的方式,嘛會當佇「自學資源」揣「試題說明佮範例」(有聲音檔)來練習。

       考試簡章佇認證考試的網站(https://blgjts.moe.edu.tw/)就有通掠,敬請參考。若猶有其他針對考試的問題,請聯絡承辦單位國立臺灣師範大學。服務專線:0800-699-566或者付費電話(02)7749-3664;服務信箱:blg.sce@deps.ntnu.edu.tw


公告時間:2020-03-30
更新時間:2020-04-10

回首頁