【新聞】教育部閩南語認證考試 對112年開始 頭擺1年會辦2改（閩南語版）(閩南語版聲音檔)
教育部對112年開始，擴大辦理閩南語語言能力認證考試，這馬一冬就會辦2改，除去逐冬固定佇8月辦的彼場掠外，嘛會對112年3月閣加開1場，這擺主要是考A卷佮B卷。
今仔日（3/4）欲考的是A卷（含A1基礎級佮A2初級），明仔載（3/5）會考B卷（含B1中級佮B2中高級）。今年全國攏總有設18个考區，有57間學校相佮鬥辦。目前頂半冬考試報名的總人額，就已經有1萬6,785个人矣（舊年規冬的報名總人數是1萬9,487个人），這擺報B卷的有9,503个人，占今年報名總數的56.62％。
按職業分類共看，嘛是學生囡仔來報名的占上大門，今年有7,057个人欲來考試，年歲無到12歲的就有3,882个人，差不多占學生組的一半較加（55％）。閣再，這改的考生歲聲上濟的有87，上茈的5歲足，猶有對日本、印尼、馬來西亞、越南等等無仝國家來的考生，嘛會做伙來鬥鬧熱。
今年團體報名的情形，全國攏總1,147組，有7,823个人報名，屏東縣的明正國中就有159个人報，算是徛頭名。這間學校的老師佮學生囡仔，較早干焦通利用社團的時間學本土語言。自「國家語言發展法」規定對111學年度開始，本土語言成做國中佮國校仔的必修課了後，學校就趁勢積極鼓舞老師佮學生囡仔做伙來參加認證考試。毋才對舊年干焦9个人報名爾，就按呢衝到今年的159个人，報考的人額就占規間學校一學年的三份一囉。
今年3月的考試成績，按算佇112年5月初1早起9點開放通網路查詢，嘛會寄成績單通知，考生準若到5月初5猶未收著的，才請佮承辦單位國立臺灣師範大學聯絡；設使對家己的成績有憢疑的，嘛通佇5月初5進前，用紙本寄批申請複查。考生成績有達到分級標準的，咱會對5月22開始寄認證證書；一禮拜內若無收著的，才請緊佮承辦單位聯絡。以上的資訊，攏會刊佇112年「閩南語語言能力認證考試」的網站（https://blgjts.moe.edu.tw），嘛通敲服務專線0800-699566照會。
