【新聞稿】110年閩南語認證考試佇4月初9開始報名(閩南語版含聲音檔)

(閩南語版含聲音檔

       教育部佇逐年的8月攏會舉辦閩南語語言能力認證考試,辦到這陣都也12冬矣,今累積的報名人數現拄現就超過9萬3囉。

       今年考試報名的期間是對4月初9早起9點,到5月初7的下晡5點,無限定身份,凡若對閩南語有趣味的,攏會當上網報名。報名費才250箍,19歲以下的優待免抾錢。準若所有的測驗(聽、講、讀、寫4項)攏考有齊的,就通提著1份紀念品(布做的喙罨佮面巾)。舊考生這擺閣再來挑戰的,若有才調加進步一級,阮猶閣有另外攢獎品等欲來相送,甲有遮好空的,較加嘛著緊猛報。為著欲鼓舞爸仔母、老師佮學生囡仔,抑是家庭、社區、公司團體,通逐家相招規團拚,凡若報名的一團有超過20个,就有機會通閣得著限量的大禮。

       教育部是對99年開始辦理認證考試的,對107年開始,19歲以下的考生有4,300外人報名,成數差不多占四成二;到舊(109)年就有7,700外人報名,占較欲五成六矣,進步是有影緊。表示當今有那來那濟的少年家,肯欲接觸佮學習閩南語囉。閣來,為著欲提升佮補足咱本土語文教學的師資,教育部用心計較下真濟法度,比論鼓舞師資培育大學著設立職前培育、學士後教育學分班佮教師在職進修專長學分班等等,嘛共通過本土語言能力認證,設做修學士後教育學分班的條件,佮欲提著師資職前教育課程學分的規範之一。社會會當行到這个坎站真無簡單,表示「母語認同」毋是口號,是趨勢,逐家著堅心拚落去!

       今年度的考試簡章佇認證考試的網站(https://blgjts.moe.edu.tw)就有通掠,敬請參考。若猶有其他針對考試的問題,請聯絡承辦單位國立臺灣師範大學。服務專線:0800-699-566、(02)7749-3664;嘛有服務信箱:blg.sce@deps.ntnu.edu.tw。


公告時間:2021-04-06
更新時間:2021-04-07

回首頁