(閩南語版聲音檔)
教育部閩南語語言能力認證考試對112年開始一冬就會辦2改,除去逐冬固定8月辦的彼場掠外,嘛會佇3月閣加開1場。
咱這个考試會照程度分做3卷,予考生家己揀看欲考佗一卷才來報名,無仝卷會辦佇無仝工,嘛請著斟酌。今仔日(3/2)欲考的是A卷,明仔載(3/3)會考B、C卷,每一卷攏會考聽、講、讀、寫4項考試項目。這擺全國攏總有設18个考區,有65間學校鬥辦,共咱相伨。報名考試的總人數是1萬8,330个人,內底報A卷的人上濟,有8,973个人占報名總人數的49%。
按職業分類共看,嘛是學生囡仔來報名的占上大面,今年有9,200个人欲來考試,主要是考A卷。其中18歲以下的考生就有8,392个人,佇學生組的比例達到91.2%。另外團體報名的,全國攏總有1,226組,9,364个人參加,這擺高雄市楠梓國中有213个人報名,算是徛頭名的,第2濟的是臺南市永康國中有182个人報。
閣再,這改的考生歲聲上濟的是81,上茈的是6歲。猶有對日本、印尼、越南、美國、加拿大、馬來西亞等等無仝國家來的人,嘛會做伙來鬥鬧熱拚懸低。
今年3月的考試成績,按算佇4月29早起9點開放通網路查詢,嘛會開始寄成績單通知。考生準若對家己的成績有憢疑的,通佇5月初3進前,用紙本寄批予承辦單位國立臺灣師範大學,申請複查。若是成績有達到分級標準的,就會對5月20開始寄認證證書,一禮拜內若無收著的,才請緊佮承辦單位聯絡。
所有的考試資訊會刊佇113年閩南語語言能力認證考試的網站https://blgjts.moe.edu.tw 予逐家通查,嘛會用得敲服務專線0800-699566佮(02)7749-3664來照會。