【新聞】教育部8月閩南語認證考試 頭一擺超過2萬人報名(閩南語版)

(閩南語版聲音檔)

教育部對112年開始,擴大辦理閩南語語言能力認證考試,這馬一冬會辦2擺,今年第1擺的考試佇3月已經辦煞,報名總人數是16,785人,其中考A卷的有7,281人,B卷有9,504人。下半冬8月的考試,攏總有20,044人報名,是咱頭一擺報名人數破2萬,這款人數佮這幾冬比起來較加嘛排頭坎!

今年第2擺的考試會分兩工考,8月初5A卷,8月初6BC卷。今年全國有設18个考區,攏總有65間學校相佮鬥辦。這擺報A卷有9,362人,占報名總數的46.71%;B卷有9,231人,占報名總數的46.05%。按職業分類共看,拍算猶是學生囡仔占上大面,今年有9,243个人報名欲來考試,年歲12歲以下的就有4,589个人,占學生組的49.65%。閣再,這擺的考生歲頭上濟的是82,上茈的4歲足。猶有對日本、印尼、英國、馬來西亞、新加坡等等無仝國家來的考生,嘛欲來做伙鬥鬧熱。團體報名的部份,全國有1,476組,攏總有9,795个人報名,徛頭名的猶原是臺南市的海佃國中有276个人報名,排第2坎的是台語文化班學會,嘛有180个人報名。

這擺的考試按算1121016早起9點開始就通佇認證網站查著成績,嘛會寄紙本的成績單通知,考生準若到1020猶未收著的,才請佮承辦單位國立臺灣師範大學聯絡。設使對家己的成績有憢疑的,嘛通佇1020進前,用紙本寄批申請複查。考生成績有達到分級標準的,咱會對11月初6開始寄認證證書;若一禮拜內無收著的,才請緊佮承辦單位聯絡。以上的資訊,攏會刊佇112年「閩南語語言能力認證考試」的網站(https://blgjts.moe.edu.tw),嘛通敲服務專線0800-699566照會。


公告時間:2023-08-05
更新時間:2023-10-18

回首頁